نائب وزیراعظم پاکستان کی سلامتی کونسل کی صدارت کی دستخطی تقریب میں شرکت کریں گے
نائب وزیراعظم محمد اسحاق ڈار امریکہ پہنچ گئے ہیں جہاں وہ نیویارک میں اقوام متحدہ کی سلامتی کونسل میں پاکستان کی صدارت کے دوران ہونے والی خصوصی تقریبات اور واشنگٹن میں دیگرمصروفیات میں شرکت کریں گے۔نیویارک میں نائب وزیراعظم کثیر جہتی حکمت عملی کے ذریعے بین الاقوامی امن اور سلامتی کو فروغ دینے اور تنازعات کے پرامن حل کے موضوع پر ایک مباحثے کی صدارت بھی کریں گے۔اس مباحثے کا مقصد کثیرجہتی سوچ کو مضبوط بنانے کے طریقے تلاش کرنا اور تنازعات کے پرامن حل کے لیے سفارت کاری اور ثالثی کوفروغ دینا ہے۔اس کے علاوہ وہ فلسطین سمیت مشرق وسطی کی صورت حال پر سلامتی کونسل میں ہونے والے سہ ماہی مباحثے کی بھی صدارت کریں گے۔اسحاق ڈار اقوام متحدہ کی سلامتی کونسل کی اعلیٰ سطح کی بریفنگ کی بھی صدارت کریں گے جس میں اقوام متحدہ اور اسلامی تعاون تنظیم کے درمیان تعاون بڑھانے پر غور کیا جائے گا۔فلسطینی عوام کے حق خودارادیت کے لیے پاکستان کے مضبوط عزم اور غیر متزلزل حمایت کے اظہار کے لیے نائب وزیر اعظم "مسئلہ فلسطین کے پرامن حل اور دو ریاستی حل پر عمل درآمد” کے موضوع پر اعلی سطح کی کانفرنس میں شرکت کریں گے۔توقع ہے کہ نیویارک میں اپنے قیام کے دوران اسحاق ڈار اپنے ہم منصبوں کے علاوہ اقوام متحدہ کے اعلیٰ حکام کے ساتھ ملاقاتیں بھی کریں گے۔
