بیرون ملک پاکستانی ملک کا قابل فخر سرمایہ ہیں، وزیر اعلیٰ پنجاب
وزیراعلیٰ مریم نواز شریف سے رکن قومی اسمبلی چوہدری نصیر احمد عباس اور مسلم لیگ (ن) جاپان کے صدر ملک نور اعوان نے ملاقات کی، ملاقات میں باہمی دلچسپی کے امور، ترقیاتی منصوبوں اور اوورسیز پاکستانیوں کے مسائل پر تفصیلی گفتگو کی گئی۔صدر پاکستان مسلم لیگ ن جاپان نے پنجاب میں امن و امان کی بہتری پر اوورسیز پاکستانیوں کے انویسٹمنٹ کے بڑھتے رحجان اور جاپان میں مقیم پاکستانی کمیونٹی کی خدمات اور مسائل سے آگاہ کیا۔ ایم ان اے نصیر عباس اور مسلم لیگ ن جاپان کے صدر ملک نور اعوان نےعوام دوست پراجیکٹس پر خراج تحسین پیش کیا۔وزیراعلیٰ مریم نواز شریف نے گفتگو کرتے ہوئے کہا کہ ہر علاقے کی یکساں ترقی اور عوامی فلاح کیلئے تمام وسائل بروئے کار لائے جا رہے ہیں، مثالی گاؤں پراجیکٹ کے تحت دیہات میں شہروں جیسی اعلیٰ معیاری سہولتیں فراہم کر رہے ہیں۔
مریم نواز شریف کا کہنا تھا کہ پنجاب میں 12 ہزار کلومیٹر روڈز کی تعمیر و بحالی ہو چکی ہے، دسمبر تک 18 ہزار کلومیٹر کی تعمیر وبحالی مکمل ہو جائے گی، فیلڈ ہسپتال اور کلینک آن وہیلز سے ایک کروڑ سے زائد مریض گھر کی دہلیز پر مستفید ہو چکے ہیں-انہوں نے کہا کہ وطن عزیز کی ترقی میں اوورسیز پاکستانیوں کا کردار ناقابل فراموش ہے، بیرون ملک پاکستانی ملک کا قابل فخر سرمایہ ہیں اور حکومت ان کے مسائل کے حل کیلئے ہر ممکن اقدامات کر رہی ہے،حکومت پنجاب سرمایہ کاری کے مواقع بڑھا رہی ہے تاکہ اوورسیز کمیونٹی کی محنت ملک کی خوشحالی میں ڈائریکٹ شامل ہو سکے۔
اس موقع پر چوہدری نصیرعباس کا کہنا تھا کہ وزیراعلیٰ مریم نواز شریف کی قیادت میں پنجاب میں عوامی خدمت کے نئے باب رقم ہو رہے ہیں۔ملک نور اعوان نے کہا کہ وزیراعلیٰ کی انتھک محنت اور ہر شعبے پر ذاتی توجہ عوام میں امید اور اعتماد کا باعث بن رہی ہے، مختصر وقت میں مثالی خدمت کرنے پر بیرون ملک مقیم پاکستانی وزیر اعلیٰ مریم نواز شریف کے وژن کو خراج تحسین پیش کرتے ہیں، اوورسیز کمیونٹی کو اطمینان ہے پنجاب حکومت انکے مسائل حل کرے گی۔
