وزیر اعلیٰ پنجاب کا لاہور ڈویلپمنٹ پلان فیز ون کو نومبر 2025ء تک مکمل کرنے کا ہدف
وزیر اعلیٰ پنجاب مریم نواز کی زیر صدارت اعلیٰ سطح کا خصوصی اجلاس منعقد ہوا، جس میں لاہور ڈویلپمنٹ پروگرام اور پنجاب ڈویلپمنٹ پلان پر ہونے والی پیشرفت کا تفصیلی جائزہ لیا گیا۔وزیر اعلیٰ کو ڈپٹی کمشنر نے لاہور ڈویلپمنٹ پروگرام پر پیشرفت سے متعلق بریفنگ دی، انہوں نے بتایا کہ لاہور ڈویلپمنٹ پروگرام فیز ون کے 5643 پراجیکٹ میں سے 2593، لاہور میونسپل کارپوریشن کی 3705 میں سے 2274 منصوبے اور واسا لاہور کے 252 میں سے 170 منصوبے مکمل کر لئے گئے ہیں۔دوران اجلاس واسا پراجیکٹس سے منسلک 1573 منصوبوں پر پیشرفت کا جائزہ لیا گیا، مریم نواز نے روڈز اور سٹریٹس کی بیوٹیفکیشن کرنے کی ہدایت کی جبکہ لاہور ڈویلپمنٹ پلان کے فیز ون کی نومبر 2025ء میں تکمیل کا بھی ہدف دیا، فیز ٹو میں علامہ اقبال، واہگہ اور عزیز بھٹی ٹاؤن کی 146 سکیمیں بھی شامل ہیں۔وزیر اعلیٰ کو 189 شہروں کی تعمیر و مرمت اور بحالی کے منصوبوں پر رپورٹ پیش کی گئی، دوران اجلاس زیادہ خراب حالت والے گلی محلے اور علاقوں کو پروگرام میں ترجیح دینے سمیت 66 شہروں میں ترجیحی بنیادوں پر ترقیاتی پراجیکٹس شروع کرنے کا فیصلہ کیا گیا جبکہ پنجاب کے 66 شہروں میں واٹر ٹینک،ڈرین ڈسپوزل سٹیشن بھی بنائے جائیں گے۔مریم نواز کا کہنا تھا کہ پنجاب کا کوئی شہر اب ترقی کے ثمرات سے محروم نہیں رہے گا، پنجاب بھر کے مذکورہ شہروں کو خوبصورت اور ترقی یافتہ بنائیں گے۔
