وزیراعظم کا سٹاک مارکیٹ میں ریکارڈ تیزی پراطمینان
وزیراعظم محمد شہباز شریف نے نئے مالی سال کے پہلے دن پاکستان سٹاک ایکسچینج میں ہنڈرڈ انڈیکس کے پہلی بار ایک لاکھ 27 ہزار پوائنٹس کی بلند ترین سطح عبور کرنے پر اطمینان کا اظہارکیا ہے۔
انہوں نے ایک بیان میں کہا کہ نیا مالی سال ایک اچھی خبر اور معاشی میدان میں ایک اہم پیشرفت سے شروع ہوا ہے جو کہ انتہائی خوش آئند ہے۔
شہباز شریف نے کہا کہ سٹاک مارکیٹ ہنڈرڈ انڈیکس کا اپنی بلند ترین سطح پر پہنچنا اس امر کا مظہر ہے کہ ملکی معیشت اور حکومتی پالیسیوں پر کاروباری برادری اور سرمایہ کاروں کا اعتماد ہر گزرتے دن کے ساتھ مضبوط و مستحکم ہو رہا ہے ۔
انہوں نے کہا کہ پچھلے مالی سال میں حکومت کی بہترین معاشی پالیسیوں کی بدولت ملکی معیشت میں انتہائی مثبت رجحان دیکھا گیا۔
وزیر اعظم نے اس یقین کا اظہار کیا کہ نیا مالی سال ملکی معیشت کی بہتری کی جانب سفر میں ایک سنگ میل ثابت ہو گا ۔
انہوں نے کہا کہ ہم کاروباری طبقے اور سرمایہ کاروں کے مشکور ہیںجو ملکی ترقی و خوشحالی میں حکومت کا بھر پور ساتھ دے رہے ہیں ۔
وزیراعظم نے ملک میں بہترین کاروباری ماحول کے فروغ اور سرمایہ کاروں کو مزید سہولتیں فراہم کرنے کے حکومتی عزم کا اظہار بھی کیا۔
