پاکستان تمام عالمی فورمز پر ایران کے مفادات کا تحفظ کرے گا، وزیر دفاع
قومی اسمبلی کا اجلاس آج (ہفتہ کو) پارلیمنٹ ہاؤس اسلام آباد میں سپیکر سردار ایاز صادق کی صدارت میں دوبارہ شروع ہوا۔بجٹ پر بحث کے دوران وزیر دفاع خواجہ آصف نے ایران کے ساتھ یکجہتی کا اظہار کیا۔
انہوں نے کہا کہ پاکستان اقوام متحدہ سمیت تمام عالمی فورمز پر ایران کے مفادات کا تحفظ کرے گا۔
ایران پر اسرائیلی حملے کی مذمت کرتے ہوئے وزیر دفاع نے کہا کہ ایران ہمارا پڑوسی اور برادر ملک ہے۔ انہوں نے تجویز پیش کی کہ او آئی سی کا اجلاس بلایا جائے جس میں ایسے اقدام کی ضرورت پر زور دیا جائے جو مسلم امہ کے اتحاد کو ظاہر کرے۔
وزیر دفاع نے کہا کہ پاکستان اپنے روایتی موقف پر قائم ہے، کیونکہ اس نے نہ تو اسرائیل کو تسلیم کیا ہے اور نہ ہی اس کے ساتھ تعلقات قائم کیے ہیں۔
پاکستان کے خلاف حالیہ بھارتی جارحیت کی طرف اشارہ کرتے ہوئے، وزیر دفاع نے کہا کہ بھارت کو اس کی بھاری قیمت چکانی پڑی، اور اس کی عالمی چمک دم توڑ گئی۔ انہوں نے کہا کہ ہماری مسلح افواج اور عوام کی طاقت اور عزم نے پانچ گنا بڑے دشمن کو خاک میں ملا دیا۔ انہوں نے کہا کہ پاکستان اپنے دفاع کے لیے پوری طرح لیس ہے اور پوری قوم اپنی مسلح افواج کے شانہ بشانہ کھڑی ہے۔
انہوں نے دہشت گردی کے خلاف جنگ میں سیکورٹی فورسز کی قربانیوں کو بھی اجاگر کیا اور اس پختہ یقین کا اظہار کیا کہ پاکستان دہشت گردی کے خلاف جنگ میں بھی کامیابی حاصل کرے گا۔
اقتصادی محاذ پر وزیر دفاع نے معاشی اشاریوں میں بہتری پر اطمینان کا اظہار کیا۔ انہوں نے کہا کہ بین الاقوامی مالیاتی ادارے اس اعتماد کا اظہار کر رہے ہیں کہ ملکی معیشت درست سمت پر گامزن ہے۔
انہیں یقین تھا کہ آنے والے سالوں میں پاکستان ایک مضبوط معیشت بن کر ابھرے گا۔
