پاکستان اور فرانس کا دوطرفہ اقتصادی تعاون کو فروغ دینے کے عزم کا اعادہ
پاکستان اور فرانس نے اپنے دوطرفہ اقتصادی تعاون کو مزید مضبوط بنانے اور ماحولیاتی اور پائیدار ترقی کے مشترکہ اہداف کو آگے بڑھانے کے عزم کا اعادہ کیا ہے۔یہ مفاہمت جمعرات کو اسلام آباد میں پاکستان میں فرانس کے سفیر نکولس گیلی اور وزیر اقتصادی امور احد چیمہ کے درمیان ملاقات کے دوران طے پائی۔فرانسیسی ترقیاتی ایجنسی کے کنٹری ڈائریکٹر ونسنٹ تھیونوٹ بھی ملاقات کے دوران سفیر کے ہمراہ تھے۔
وزیر نے ایجنسی کے ذریعے فرانسیسی حکومت کی مسلسل حمایت کو سراہا اور کہا کہ فرانس توانائی، شہری ترقی، میونسپل سروسز اور تکنیکی ترقی میں ایک قابل قدر ترقیاتی شراکت دار رہا ہے۔انہوں نے اس بات پر روشنی ڈالی کہ فرانس کی ترقیاتی ایجنسی کی مدد سے اس وقت 14 پراجیکٹس پر عمل درآمد کیا جا رہا ہے، اور سات مزید پائپ لائن میں ہیں۔وزیر نے امید ظاہر کی کہ ان پائپ لائن پراجیکٹس کو اے ایف ڈی بورڈ سے جلد ہی منظور کر لیا جائے گا۔
انہوں نے گلگت بلتستان اور خیبرپختونخوا کے لیے دیہی ترقی اور موسمیاتی لچک کے اقدام اور پنجاب کے بڑے شہروں کے لیے اربن ویسٹ واٹر گورننس پروجیکٹ کی اہمیت پر زور دیا۔سفیر نے پاکستان کی ترقی کی ترجیحات کے لیے فرانسیسی حکومت اور اے ایف ڈی کے مکمل تعاون کا یقین دلایا۔
انہوں نے جاری منصوبوں کی بروقت تکمیل اور مجوزہ اقدامات کی جلد منظوری کو یقینی بنانے کے لیے پاکستان کے ساتھ مل کر کام کرنے کے لیے فرانس کے عزم کا اعادہ کیا۔اس موقع پر احد چیمہ نے پاکستان کے جی ایس پی پلس اسٹیٹس کے لیے فرانس کی حمایت پر شکریہ ادا کیا اور کہا کہ یہ ترجیحی تجارتی انتظام یورپی یونین میں پاکستان کی برآمدات کو بڑھانے کے لیے بہت ضروری ہے۔
