پاک بھارت کشیدگی کم کرنے میں روس اہم کردار ادا کرسکتا ہے، صدر زرداری
صدر آصف علی زرداری نے روس کے ساتھ تجارت، سرمایہ کاری، ٹیکنالوجی اور عوام سے عوام کے تبادلے میں دوطرفہ تعاون کو مزید وسعت دینے کے پاکستان کے عزم کا اعادہ کیا ہے۔
وہ آج اسلام آباد میں عظیم محب وطن جنگ میں روسی فیڈریشن کی فتح کی 80ویں سالگرہ کے موقع پر ایک تقریب سے خطاب کر رہے تھے۔
صدر نے پاک روس تعلقات میں بڑھتی ہوئی رفتار پر روشنی ڈالی اور اس اعتماد کا اظہار کیا کہ دونوں ممالک کے درمیان حالیہ اعلیٰ سطحی رابطوں نے گہری روابط اور وسیع تر افہام و تفہیم کی مضبوط بنیاد رکھی ہے۔
اپنے 2011 کے دورہ روس کو یاد کرتے ہوئے صدر زرداری نے پاک روس دوستی کو فروغ دینے کے لیے صدر پیوٹن کی کوششوں کا اعتراف کیا۔
انہوں نے کہا کہ علاقائی امن اور استحکام کو فروغ دینے میں روس کا کردار اہم ہے، خاص طور پر پاکستان اور بھارت کے درمیان بڑھتی ہوئی کشیدگی کو کم کرنے میں۔
صدر نے خطے اور دنیا کے بہتر مستقبل کے لیے مل کر کام کرنے کی ضرورت کے علاوہ پاکستان اور روس کے درمیان افہام و تفہیم اور تعاون کے پُل تعمیر کرنے کے عزم کا اعادہ کیا۔
