پاکستان کسی بھی بھارتی جارحیت کا بھرپور جواب دینے کیلئے پرعزم ہے، محمد خالد جمالی
پاکستان بھارت کی کسی بھی مہم جوئی کا بھرپور طاقت کے ساتھ جواب دے گا۔یہ بات روس میں پاکستان کے سفیر محمد خالد جمالی نے ایک غیر ملکی میڈیا کے ساتھ خصوصی انٹرویو میں کہی۔انہوں نے کہا کہ پہلگام واقعے کے پس منظر میں بھارت نے اپنے مشن کے حجم میں کمی، سرحدوں کی بندش اور سندھ طاس معاہدے کی معطلی سمیت بعض اقدامات کا اعلان کیا ہے۔ انہوں نے واضح کیا کہ اس معاہدے کے تحت مغربی دریاؤں کا تمام پانی شمال سے جنوب کی طرف پاکستان کو جائے گا۔
سفیر نے اس بات پر زور دیا کہ 240 ملین آبادی پر مشتمل پاکستان کا زیادہ تر انحصار زراعت پر ہے جو کہ ملک کی لائف لائن کے طور پر کام کرتی ہے۔ انہوں نے متنبہ کیا کہ زیریں دریا کے پانی کو غصب کرنے، روکنے یا موڑنے کی کوئی بھی کوشش پاکستان کے خلاف جنگ کے مترادف ہوگی اور اسے پوری طاقت کے ساتھ پورا کیا جائے گا۔
محمد خالد جمالی نے اس بات کی بھی نشاندہی کی کہ بھارت میں میڈیا کی جنونی کوریج، بھارتی حکام کے غیر ذمہ دارانہ بیانات اور کچھ لیک ہونے والی دستاویزات سے پتہ چلتا ہے کہ بھارت پاکستان کے مخصوص علاقوں پر حملہ کرنے کی منصوبہ بندی کر رہا ہے۔انہوں نے اس بات کا اعادہ کیا کہ پاکستان کی مسلح افواج پاکستانی عوام کی حمایت سے بھرپور طاقت کے ساتھ جواب دیں گی۔
