پنجاب کے مختلف علاقوں میں موسلادھار بارش، آندھی، گرج چمک اور ژالہ باری کا امکان
جمعہ کی شام سے ہفتہ تک پنجاب کے مختلف علاقوں میں موسلادھار بارش، آندھی، گرج چمک اور ژالہ باری کا امکان ہے، جس سے انفراسٹرکچر، ٹرانسپورٹیشن اور زرعی سرگرمیوں کو خطرات لاحق ہیں۔این ڈی ایم اے کے نیشنل ایمرجنسی آپریشن سینٹر کے مطابق اسلام آباد، راولپنڈی، اٹک، چکوال، گجرات، جہلم، فیصل آباد، حافظ آباد، جھنگ، خوشاب، میانوالی، لاہور، نارووال، ساہیوال، سرگودھا اور شیخوپورہ میں موسم متاثر ہو سکتا ہے۔
تیز ہواؤں اور تیز بارش کی وجہ سے درخت گر سکتے ہیں، جس کے نتیجے میں بجلی کی عارضی بندش ہو سکتی ہے۔ ژالہ باری فصلوں اور بیرونی ڈھانچے کو نقصان پہنچا سکتی ہے، خاص کر شیشے کی سطحوں والی۔مسافروں کو مشورہ دیا جاتا ہے کہ روانگی سے پہلے سڑک کے حالات کا جائزہ لیں اور شدید موسم میں غیر ضروری سفر سے گریز کریں۔ لینڈ سلائیڈنگ کے شکار علاقوں میں لوگوں کو چوکنا رہنا چاہیے اور مقامی حفاظتی ہدایات پر عمل کرنا چاہیے۔این ڈی ایم اے نے عوام پر بھی زور دیا کہ وہ شدید موسمی حالات سے منسلک خطرات کو کم کرنے کے لیے ضروری احتیاطی تدابیر اختیار کریں۔
