وزیراعظم کا برطانیہ سے تعلقات مضبوط بنانے کی خواہش کا اعادہ

وزیراعظم شہباز شریف نے برطانیہ کے ساتھ تجارت، سرمایہ کاری، تعلیم اور عوامی تبادلوں سمیت دیگر شعبوں میں تعلقات مزید مضبوط بنانے کی پاکستان کی خواہش کا اعادہ کیا ہے۔انہوں نے یہ بات مذاہب، کمیونٹیز اور آبادکاری کے بارے میں برطانیہ کے پارلیمانی انڈر سیکرٹری لارڈ واجد خان سے اسلام آباد میں ملاقات میں کہی۔شہباز شریف نے برطانیہ میں مقیم پاکستانی برادری کے تعاون کو سراہا، جو دونوں ممالک کے درمیان پل کا کردار ادا کر رہے ہیں۔

وزیر اعظم نے کنگ چارلس سوم اور برطانوی وزیراعظم کیئر سٹارمر کیلئے نیک خواہشات کا اظہار کیا۔شہباز شریف نے پاکستان اور برطانیہ کے درمیان تعلقات کو فروغ دینے اور تعاون کی نئی راہیں تلاش کرنے میں لارڈ واجد خان کی کوششوں کو سراہا۔ملاقات میں لارڈ واجد خان نے وزیراعظم کو پاکستان،برطانیہ تعلقات کو مزید فروغ دینے کے اقدامات سے آگاہ کیا۔