وزیراعظم سے وزیر اعلیٰ بلوچستان اور وزیر داخلہ محسن نقوی کی علیحدہ علیحدہ ملاقات
وزیر اعظم شہباز شریف سے وفاقی وزیر داخلہ محسن نقوی اور وزیر اعلیٰ بلوچستان میر سرفراز بگٹی کی الگ الگ ملاقاتوں میں سیکیورٹی اور امن و امان کی صورتحال پر تبادلہ خیال کیا گیا۔ وزیر اعظم شہباز شریف سے وفاقی وزیر داخلہ محسن نقوی اور وزیر اعلیٰ بلوچستان میر سرفراز بگٹی نے الگ الگ ملاقاتیں کی۔
وزیر داخلہ نے وزیراعظم کو ملک میں سیکیورٹی کے لیے کیے گئے اقدامات اور افغان باشندوں کی وطن واپسی کے عمل کی پیشرفت کے حوالے سے آگاہ کیا۔وزیراعظم نے بالخصوص عیدالفطر کے موقع پر ملک میں امن و امان کی صورتحال پر اطمینان کا اظہار کیا۔
وزیر اعلیٰ بلوچستان میر سرفراز بگٹی کی وزیر اعظم سے ملاقات میں بلوچستان کی موجودہ اقتصادی، سماجی اور امن وامان کی صورتحال پر تفصیلی گفتگو اور وفاقی حکومت کی جانب سے بلوچستان کے لیے جاری ترقیاتی منصوبوں پر تبادلہ خیال کیا گیا۔وزیر اعلیٰ بلوچستان نے شہباز شریف کو صوبے کی ترقی کے حوالے سے موجودہ منصوبوں کی پیشرفت سے آگاہ کیا۔
وزیر اعظم نے کہا کہ بلوچستان کی ترقی کے لیے وفاقی حکومت ہر ممکن تعاون فراہم کرے گی۔ان کا کہنا تھا کہ صوبے کی ترقی وفاقی حکومت کی اولین ترجیحات میں شامل ہے اور اس مقصد کے لیے تمام ضروری اقدامات کیے جائیں گے۔
