سعودی وزیر کی پاکستانی حجاج کے مسائل ترجیحی بنیادوں پر حل کرنے کی یقین دہانی
وفاقی وزیر مذہبی امور اور بین المذاہب ہم آہنگی سردار محمد یوسف نے آج جدہ میں وزیر حج و عمرہ ڈاکٹر توفیق بن فوزان الربیعہ سے ملاقات کی۔ملاقات کے دوران عازمین حج اور عمرہ زائرین کیلئے سہولیات کے ساتھ ساتھ "روڈ ٹو مکہ” منصوبے کو پاکستان کے دیگر شہروں تک توسیع دینے کے حوالے سے بات چیت کی گئی۔سردار محمد یوسف نے سعودی وزیر سے عازمین حج کی رجسٹریشن سے متعلق امور پر بھی تبادلہ خیال کیا۔سعودی وزیر نے یقین دلایا کہ پاکستانی حجاج کو درپیش مسائل کو ترجیحی بنیادوں پر حل کیا جائے گا۔ انہوں نے کہا کہ حج اور عمرہ زائرین کو سہولیات کی فراہمی سعودی حکومت کی اولین ترجیحات میں شامل ہے اور سعودی حکومت پاکستانی حجاج کو مزید تعاون پیش کرے گی۔
ڈاکٹر توفیق بن فوزان الربیعہ نے کہا کہ حجاج کرام کو بہترین سہولیات کی فراہمی یقینی بنانے کیلئے کئی نئے اقدامات کئے گئے ہیں۔انہوں نے کہا کہ ہر سال پاکستان سے بڑی تعداد میں حجاج کرام سعودی عرب جاتے ہیں اور ان کی خدمت کرنا ایک اعزاز کی بات ہے۔سردار محمد یوسف نے عازمین حج کو بہترین سہولیات فراہم کرنے پر شاہ سلمان بن عبدالعزیز اور ولی عہد محمد بن سلمان کو خراج تحسین پیش کیا۔انہوں نے سعودی وزیر حج کی طرف سے پاکستانی عازمین حج کی سہولت پر خصوصی توجہ دینے پر بھی شکریہ ادا کیا۔
