چیمپئنز ٹرافی، آسڑیلیا اور افغانستان کا میچ بارش کے باعث ختم، کینگروز سیمی فائنل میں پہنچ گئے
آئی سی سی چیمپئنز ٹرافی کے گروپ بی کا افغانستان اور آسٹریلیا کے اہم میچ بارش کی وجہ سے ختم کردیا گیا تاہم آسٹریلیا نے سیمی فائنل میں جگہ بنالی۔افغانستان کے 274 رنز کے ہدف کے تعاقب میں آسٹریلیا نے 12.5 اوورز میں ایک وکٹ کے نقصان پر 109 رنز بنائے تاہم بارش کے باعث میچ روک دیا گیا اور اب میچ فیلڈ گیلی ہونے کے باعث ختم کردیا گیا۔
دونوں ٹیموں کو ایک ایک پوائنٹ مل گئے اور 4 پوائنٹس ہونے پر آسٹریلیا نے سیمی فائنل کیلئے کوالیفائی کرلیا۔لاہور کے قذافی اسٹیڈیم میں کھیلے گئے میچ افغانستان نے ٹاس جیت کر بیٹنگ کا فیصلہ کیا۔ افغانستان کی جانب سے اننگز کا آغاز مایوس کن رہا اور پہلی وکٹ 3 رنز پر گری۔
اس کے بعد ابراہیم اور صدیق اللہ نے ذمہ دارانہ بیٹنگ کی تاہم ابراہیم زادران 22رنز بنا کر آؤٹ ہوگئے، پھر رحمت شاہ 12 رنز بنا کر پویلین لوٹے۔صدیق اللہ بھی 85 رنز بناکر کیچ آؤٹ ہوئے۔ عظمت اللہ عمرزئی کی شاندار بیٹنگ کی بدولت افغان ٹیم آخری اوور کی آخری گیند پر 273 رنز بناکر ڈھیر ہوگئی۔عظمت اللہ عمر زئی67 رنز بناکر نمایاں رہے۔ آسٹریلیا کی جانب سے بین نے 3، جانسن اور زمپا نے 2، 2 کھلاڑیوں کو آؤٹ کیا۔افغانستان کے 274 رنز کے ہدف کے تعاقب میں آسٹریلیا نے جارحانہ کھیل پیش کیا اور 12.5 اوورز میں ایک وکٹ کے نقصان پر 109 رنز بنائے۔
اس دوران بارش کے باعث میچ روک دیا گیا پھر میچ کو گیلی فیلڈ کے باعث ختم کردیا گیا اور دونوں ٹیموں کو ایک ایک پوائنٹ دیا گیا۔ آسٹریلیا کے 4 پوائنٹس ہوگئے جس کے ساتھ ہی سیمی فائنل کیلئے بھی کوالیفائی کرلیا۔خیال رہے کہ گروپ بی کا آخری میچ کل جنوبی افریقا اور انگلینڈ کے درمیان کھیلا جائے گا۔
