وزیراعظم شہباز شریف پیر سے آذربائیجان کا دو روزہ دورہ کرینگے
وزیراعظم محمد شہباز شریف پیر سے جمہوریہ آذربائیجان کا دو روزہ سرکاری دورہ کریں گے۔وزیراعظم یہ دورہ آذربائیجان کے صدر الہام علییف کی دعوت پر کررہے ہیں۔مارچ 2024 میں اقتدار سنبھالنے کے بعد شہباز شریف کا آذربائیجان کا یہ دوسرا دورہ ہوگا۔
ان کے ہمراہ ایک اعلیٰ سطحی وفد بھی ہوگا جس میں نائب وزیراعظم اور وزیر خارجہ سینیٹر محمد اسحاق ڈار اور کابینہ کے دیگر اہم ارکان شامل ہیں، جو آذربائیجان کے ساتھ اپنے تعلقات کو مزید گہرا کرنے کے لیے پاکستان کے مضبوط عزم کی عکاسی کرتا ہے۔
دورے کے دوران،دنوں ممالک باہمی دلچسپی کے شعبوں پر وسیع پیمانے پر بات چیت کریں گے تاکہ توانائی، تجارت، دفاع، تعلیم اور موسمیاتی شعبوں میں دوطرفہ تعاون کو مزید مضبوط کیا جا سکے۔اس دورے کے دوران دونوں فریقین کے درمیان تعاون کے متعدد شعبوں میں متعدد مفاہمت کی یادداشتوں اور معاہدوں پر دستخط کیے جانے کی امید ہے۔
توقع ہے کہ وزیر اعظم جمہوریہ آذربائیجان کی ایکسپورٹ اینڈ انویسٹمنٹ پروموشن ایجنسی کے تعاون سے منعقد ہونے والے بزنس فورم کے دوران ایک کلیدی تقریر بھی کریں گے۔دورے کے دوران وزیر اعظم آذربائیجان کے صدر کے ہمراہ قرہ باغ کے آزاد کردہ علاقوں کے خصوصی دورے کے ایک حصے کے طور پر فزولی، قرہ باغ بھی جائیں گے۔
وزیراعظم کا دورہ آذربائیجان کے ساتھ اپنے تعلقات کو مزید مضبوط بنانے، وسیع تر اقتصادی تعاون کو فروغ دینے اور مشترکہ ترقی کے لیے شراکت داری کی نئی راہیں تلاش کرنے کے لیے پاکستان کے ثابت قدم عزم کی نشاندہی کرتا ہے۔
