لیفٹیننٹ محمد حسن اشرف شہید کی نماز جنازہ ادا، وزیراعظم کی بھی شرکت
شمالی وزیرستان کے علاقے میران شاہ میں مادر وطن کا دفاع کرتے ہوئے جام شہادت نوش کرنے والے لیفٹیننٹ محمد حسن اشرف شہید کی نماز جنازہ لاہور گیریژن میں ادا کر دی گئی۔
آئی ایس پی آر کے مطابق وزیراعظم محمد شہباز شریف، وزیر دفاع خواجہ محمد آصف، وزیر اطلاعات عطا اللہ تارڑ، اعلیٰ حاضر سروس فوجی اور سول حکام اور شہید کے لواحقین نے نماز جنازہ میں شرکت کی۔
اپنے بیان میں وزیراعظم نے کہا کہ یہ عظیم قربانی ہمارے ان بہادر بیٹوں کی غیر متزلزل لگن اور بہادری کی ایک اور شاندار مثال ہے، جنہوں نے اپنے پیارے وطن کی سالمیت اور دفاع کے لیے اپنی جانوں کا نذرانہ پیش کیا۔ انہوں نے کہا کہ پوری قوم ہماری مسلح افواج کے ساتھ غیر متزلزل یکجہتی کے لیے متحد ہے۔
لیفٹیننٹ محمد حسن اشرف شہید کو قوم کے لیے ان کی عظیم قربانی کے اعتراف میں پورے فوجی اعزاز کے ساتھ سپرد خاک کیا جائے گا۔
