پاکستان اور ترکی مختلف شعبوں میں تعاون کو بہتر بنانے کیلئے پرعزم
پاکستان اور ترکی نے مختلف شعبوں میں تعاون کو بہتر بنانے کا عزم کیا۔پاکستان اور ترکی نے تجارت، معیشت، توانائی، دفاع، سیاحت اور عوام سے عوام کے رابطوں کے شعبوں میں دوطرفہ تعاون کو مزید بہتر بنانے کے عزم کا اعادہ کیا ہے۔
اس عزم کا اظہار پاکستان کے دورے پر آئے ہوئے ترک صدر رجب طیب اردوان اور صدر آصف علی زرداری کے درمیان آج اسلام آباد میں ہونے والی ملاقات میں کیا گیا۔
اقتصادی تعاون میں اضافے کے وسیع امکانات پر زور دیتے ہوئے دونوں فریقوں نے تجارتی اور سرمایہ کاری کے تعلقات کو بڑھانے کی ضرورت پر زور دیا۔
صدر اردگان اور ان کے وفد کا خیرمقدم کرتے ہوئے صدر آصف علی زرداری نے کہا کہ پاکستان اور ترکی کے درمیان تاریخی برادرانہ تعلقات ہیں اور مختلف عالمی فورمز پر ایک دوسرے کی حمایت کرتے ہیں۔ انہوں نے اس بات پر زور دیا کہ صدر اردگان کا دورہ پاکستانی عوام کے لیے خصوصی اہمیت کا حامل ہے اور اس سے دوطرفہ تعلقات کو مزید مستحکم کرنے میں مدد ملے گی۔
آصف علی زرداری نے کہا کہ پاکستان سرمایہ کاری کے لیے سازگار ماحول فراہم کرتا ہے۔ انہوں نے اسلام آباد کی اس خواہش کا اعادہ کیا کہ پاکستان میں ترکی کے کاروباری اداروں بشمول اسٹاک مارکیٹ اور معیشت کے دیگر اہم شعبوں میں سرمایہ کاری میں اضافہ کیا جائے۔
پاکستان کے صدر نے دونوں ممالک کے بینکاری شعبوں میں تعاون بڑھانے پر زور دیا تاکہ کاروبار کو آسان بنایا جا سکے اور دوطرفہ تجارتی حجم کو اس کی پوری صلاحیت کے مطابق بڑھایا جا سکے۔ انہوں نے سیاحت کی حوصلہ افزائی اور عوام کے درمیان تعلقات کو مضبوط بنانے کے لیے پاکستان اور ترکی کے درمیان رابطے اور فضائی روابط بڑھانے کی ضرورت پر زور دیا۔
ملاقات میں علاقائی اور بین الاقوامی مسائل بالخصوص غزہ اور شام پر بھی تبادلہ خیال کیا گیا اور خطے اور عالمی سطح پر امن و استحکام کے فروغ کے لیے مل کر کام کرنے پر اتفاق کیا گیا۔
آصف علی زرداری نے ترک صدر رجب طیب اردوان کا کشمیریوں کے حق خودارادیت کی اصولی حمایت پر شکریہ ادا کیا۔
صدر اردگان نے دوطرفہ اقتصادی تعلقات کو مضبوط بنانے کے لیے ترکی کے عزم کا اعادہ کیا، انہوں نے کہا کہ دوطرفہ تجارت کو پانچ ارب ڈالر تک بڑھانے کے لیے ترکی کی کمپنیوں کی پاکستان میں سرمایہ کاری کی حوصلہ افزائی جاری رکھنے کے عزم کا اظہار کیا۔
ترک صدر نے دوستی کو آنے والی نسلوں تک پہنچانے کے لیے عوام کے درمیان تعلقات کو بڑھانے پر زور دیا۔ انہوں نے پاکستان کی ترقی اور استحکام کو سراہا۔ انہوں نے قبرص کے معاملے پر ترکی کی پاکستان کی مسلسل حمایت پر صدر کا شکریہ بھی ادا کیا۔ انہوں نے کہا کہ جموں و کشمیر کا تنازعہ بات چیت کے ذریعے اور اقوام متحدہ کی سلامتی کونسل کی قراردادوں کے مطابق حل ہونا چاہیے۔
ملاقات کے بعد صدر آصف علی زرداری نے صدر اردگان، خاتون اول ایمن ایردوآن اور ترک وفد کے اعزاز میں ضیافت کا اہتمام کیا۔
