وزیراعظم شہباز شریف کل سے متحدہ عرب امارات کا دو روزہ سرکاری دورہ کرینگے
وزیر اعظم محمد شہباز شریف دبئی میں عالمی حکومتوں کے سربراہی اجلاس میں شرکت کے لیے پیر سے متحدہ عرب امارات کا دو روزہ سرکاری دورہ کریں گے۔وہ یہ دورہ متحدہ عرب امارات کے نائب صدر اور وزیراعظم اور دبئی کے حکمران شیخ محمد بن راشد المکتوم کی دعوت پر کررہے ہیں۔
سربراہی اجلاس حکمرانی، اختراعات اور بین الاقوامی تعاون کے مستقبل پر تبادلہ خیال کے لیے ریاست اور حکومت کے سربراہان، عالمی پالیسی سازوں، اور نجی شعبے کی سرکردہ شخصیات کی ایک بڑی تعداد کو اکٹھا کرے گا۔
مارچ 2024 میں عہدہ سنبھالنے کے بعد یہ وزیر اعظم محمد شہباز شریف کا متحدہ عرب امارات کا دوسرا دورہ ہے۔ان کے ہمراہ ایک اعلیٰ سطحی وفد بھی ہوگا جس میں نائب وزیراعظم اور وزیر خارجہ اسحاق ڈار اور کابینہ کے دیگر اہم ارکان شامل ہیں، جو متحدہ عرب امارات اور دیگر عالمی شراکت داروں کے ساتھ اپنی مصروفیات کو گہرا کرنے کے لیے پاکستان کے مضبوط عزم کی عکاسی کرتا ہے۔
اپنے دورے کے دوران، وزیر اعظم عالمی حکومتوں کے سربراہی اجلاس میں کلیدی خطاب کریں گے، جس میں جامع اقتصادی ترقی، ڈیجیٹل تبدیلی اور گورننس اصلاحات کے لیے پاکستان کے وژن کو اجاگر کیا جائے گا۔
وہ متحدہ عرب امارات کی قیادت کے ساتھ دوطرفہ ملاقاتیں بھی کریں گے اور شریک ممالک کے سربراہان مملکت اور حکومت اور بڑی ملٹی نیشنل کمپنیوں کے سرکردہ سی ای اوز سے بھی ملاقات کریں گے۔
وزیراعظم کا دورہ متحدہ عرب امارات کے ساتھ اپنے تعلقات کو مزید مضبوط بنانے، وسیع تر اقتصادی تعاون کو فروغ دینے اور باہمی خوشحالی کے لیے شراکت داری کی نئی راہیں تلاش کرنے کے لیے پاکستان کے غیر متزلزل عزم کی نشاندہی کرتا ہے۔
