فی تولہ سونے کی قیمت تاریخ میں پہلی بار 3 لاکھ روپے سے تجاوز
ملک بھر میں سونے کی قیمتوں میں ریکارڈ تیزی کا سلسلہ جاری ہے، آج فی تولہ سونے کی قیمت تاریخ میں پہلی بار 3 لاکھ روپے سے تجاوز کرگئی۔سرکاری خبر رساں ادارے ’اے پی پی‘ کے مطابق جیولرز ایسوسی ایشن نے بتایا کہ 24 قیراط کے حامل خالص سونے کی فی تولہ قیمت ایک ہزار 346 روپے بڑھ کر 3 لاکھ 46 روپے ریکارڈ کی گئی ہے۔
اسی طرح 24 قیراط 10 گرام سونے کا بھاؤ ایک ہزار 154 روپے اضافے سے 2 لاکھ 57 ہزار 241 روپے ہو گیا جبکہ 22 قیراط 10 گرام سونا مہنگا ہو کر 2 لاکھ 35 ہزار 812 روپے میں فروخت ہوا۔ادھر، چاندی کی فی تولہ اور 10 گرام قیمت بھی بالترتیب 51 روپے اور 44 روپے اضافے کے بعد 3 ہزار 378 روپے اور 2 ہزار 896 روپے تک جاپہنچی۔
ایسوسی ایشن نے رپورٹ کیا کہ عالمی منڈی میں فی اونس سونا 10 ڈالر مہنگا ہو کر 2 ہزار 869 ڈالر میں فروخت ہوا۔واضح رہے کہ 5 فروری کو سونے کی فی تولہ قیمت یکدم 5 ہزار 300 روپے بڑھ کر ملکی تاریخ میں پہلی بار 3 لاکھ روپے کے قریب پہنچ گئی تھی۔
اسی طرح 24 قیراط 10 گرام سونا 4 ہزار 158 روپے بڑھ کر 2 لاکھ 56 ہزار 859 روپے میں فروخت ہوا، جبکہ 22 قیراط کے 10 گرام سونے کے دام 2 لاکھ 35 ہزار 454 روپے ریکارڈ کیے گئے تھے۔تاہم اگلے روز 6 فروری کو 24 قیراط کے حامل فی تولہ خالص سونے کے نرخ 900 روپے تنزلی سے 2 لاکھ 98 ہزار 700 روپے ہوگئے تھے۔
4 فروری کو ملک بھر میں سونے کی قیمتیں بُلندی پر پہنچنے کا سلسلہ جاری رہا تھا اور فی تولہ قیمت ایک ہزار 900 روپے بڑھ کر 2 لاکھ 94 ہزار 300 روپے تک جاپہنچی تھی۔اس سے قبل 31 جنوری کو سونے کے نرخ 2 لاکھ 91 ہزار 800 روپے کی نئی بلند ترین سطح پر ریکارڈ کیے گئے تھے اور یہ سلسلہ یکم فروری (بروز ہفتہ) کے بعد گزشتہ روز (3 فروری) کو بھی جاری رہا تھا جب فی تولہ دام 2 لاکھ 92 ہزار 400 کی بُلند سطح پر پہنچے تھے۔
