وزیر اعلیٰ پنجاب کی راولپنڈی رنگ روڈ دسمبر تک مکمل کرنے کی ہدایت

وزیر اعلیٰ پنجاب مریم نواز شریف نے متعلقہ حکام کو راولپنڈی رنگ روڈ منصوبہ دسمبر تک مکمل کرنے کی ہدایت کی ہے۔انہوں نے یہ ہدایات آج مذکورہ پروجیکٹ کے اچانک دورے کے دوران دیں۔اس موقع پر گفتگو کرتے ہوئے وزیراعلیٰ نے کہا کہ 38 کلومیٹر طویل راولپنڈی رنگ روڈ منصوبے کی تکمیل سے ٹریفک کا دیرینہ مسئلہ حل ہو جائے گا۔ انہوں نے کہا کہ مذکورہ منصوبے کی تکمیل کے لیے فنڈز کی فراہمی کو یقینی بنایا جائے گا۔

مریم نواز نے مذکورہ منصوبے کا فضائی نظارہ بھی کیا اور خاصلہ خورد راولپنڈی رنگ روڈ کیمپ آفس کا دورہ بھی کیا۔پراجیکٹ کے بارے میں بریفنگ دیتے ہوئے کمشنر راولپنڈی ڈویژن نے بتایا کہ بنٹھ، چک بیلی خان، اڈیالہ روڈ، چکری روڈ اور ٹھلیاں میں پانچ انٹر چینجز بنائے جائیں گے۔ مزید برآں، راولپنڈی رنگ روڈ منصوبے پر ریلوے پل اور پانچ اوور پاس بنائے جائیں گے جن میں اکیس سب ویز ہوں گے۔

اشتہار