نگران وزیر اعظم انوار الحق کاکڑ چین کے دورے پر روانہ ہوگئے
نگران وزیر اعظم انوار الحق کاکڑ چین کے دورے پر روانہ ہوگئے، جہاں وہ دارالحکومت بیجنگ میں اکتوبر 17 سے 18 تک منعقد ہونے والے ’تیسرے بیلٹ اینڈ روڈ فورم برائے بین الاقوامی تعاون‘ میں شرکت کریں گے۔یہ تقریب بیجنگ میں چینی صدر شی جن پنگ کے عالمی انفرااسٹرکچر اور توانائی کے اقدامات کی 10ویں سالگرہ منانے کے مواقع پر منعقد کی جا رہی ہے، جو شاہراہ ریشم کے ذریعے عالمی تجارت کو فروغ دینے کے لیے ہے۔
سماجی رابطوں کی ویب سائٹ ایکس پر نگران وزیر اعظم نے لکھا کہ چینی صدر کی باضابطہ دعوت پر بیجنگ میں منعقد ہونے والے تیسرے بیلٹ اینڈ روڈ فورم میں شرکت کے لیے روانہ ہو رہا ہے۔انہوں نے کہا کہ تعلقات کو مضبوط کرنے، تبادلہ خیال، نئی شراکت داری قائم کرنے اور روشن مستقبل کے لیے علاقائی رابطوں کے فروغ کا منتظر ہوں۔
نگران وزیرِ اعظم انوار الحق کاکڑ چینی صدر عزت مآب شی جن پنگ کی دعوت پر اسلام آباد سے بیجنگ روانہ ہو گئے.
وزیرِ اعظم اپنے دورہء چین کے دوران 17 اور 18 اکتوبر کو منعقد ہونے والے تیسرے بیلٹ اینڈ روڈ فورم برائے بین الاقوامی تعاون (Third Belt and Road Forum—BRF—for International… pic.twitter.com/wALcBIXgBd
— Prime Minister's Office (@PakPMO) October 16, 2023
وزیر اعظم آفس نے انوار الحق کاکڑ کی اسلام آباد سے روانگی کی ویڈیو شیئر کرتے ہوئے لکھا کہ نگران وزیر اعظم تقریب میں پاکستان کی نمائندگی اور گزشتہ 10 سالوں میں پاک چین اقتصادی راہداری (سی پیک) کے تحت حاصل کی گئی ترقیاتی کامیابیوں کا اعادہ، مستقبل کے اہداف اور اس ہم منصوبے میں پاکستان کے مکمل تعاون کا یقین دلائیں گے۔
وزیر اعظم آفس نے بتایا کہ افتتاحی تقریب میں شرکت کے علاوہ وزیر اعظم 18 اکتوبر کو اعلیٰ سطح کے فورم میں ’عالمی معیشت میں کنیکٹویٹی‘ کے عنوان پر خطاب کریں گے۔اس قبل بتایا گیا تھا کہ نگران وزیراعظم انوار الحق کاکڑ کے 16 اکتوبر سے شروع ہونے والے 4 روزہ دورہ چین کے دوران موٹرویز اور ہائی ویز کے حوالے سے پاکستان اور چین اہم معاہدوں پر دستخط کریں گے۔
عالمی خبر رساں اداروں ’رائٹرز اور اے ایف پی‘ کے مطابق فورم میں سینئر چینی حکام، تاجر رہنما اور بڑے سرمایہ کار شرکت کے ساتھ روسی صدر ولادیمیر پیوٹن اور افغان طالبان حکومت کی شرکت بھی متوقع ہے۔نگران وزیر داخلہ سرفرار بگٹی بھی انوار الحق کاکڑ کے ساتھ چین کا دورہ کر رہے ہیں۔
