اللہ تعالیٰ کے فضل و کرم سے نورپورتھل کاعلاقہ مجموعی طور پر پر امن ہے، ایس ایچ او ملک زعیم مہدی بھڈوال

خوشاب (راجہ نورالہی عاطف سے) ایس ایچ او نورپورتھل ملک زعیم مہدی بھڈوال نے کہا ہے کہ اللہ تعالیٰ کے فضل و کرم سے نورپورتھل کاعلاقہ مجموعی طور پر پر امن ہے اور یہاں کے لوگ بہت اچھے ہیں ۔ ان خیالات کا اظہار انہوں نے نورپورتھل پریس کلب کے عہدیداران و ممبران کے وفد کے ساتھ تعارفی نشست کے دوران خصوصی گفتگو کرتے ہوئے کیا ۔ وفد کی قیادت چیرمین پریس کلب سیٹھ ثمر سلطان کر رہے تھے ۔ وفد میں سرپرست اعلی ا نورپورتھل پریس کلب ملک محمدحیات جوئیہ ، فاؤنڈر ممبرز ایم نوردین ،راجہ نورالہی عاطف اور سینئر صحافی ملک غلام جیلانی وڈھل شامل تھے ۔ اسٹیشن ہاؤس آفیسر نے کہا کہ انشاءاللہ عوامی ریلیف کے لئے ہرگز کوئی دقیقہ فروگزاشت نہیں کیا جائے گا ۔ ملک زعیم مہدی بھڈوال نے کہا کہ ظالم کو کیفرِ کردار تک پہنچانا، مظلوم کی داد رسی، میرٹ کا بول بالا، کرائمز پیشہ افراد کی بیخ کنی ، سٹریٹ کرائمز کا خاتمہ، جوئے بازوں اور منشیات فروشوں کے خلاف قانون کا گھیرا تنگ کرنا اور گشت کے نظام کو مزید موثر بنانا میری ترجیحات ہیں ۔ ایس ایچ او نے نورپورتھل پریس کلب کے وفد پر زور دیا کہ معاشرتی اصلاح و فلاح کے لیے پولیس کے ساتھ بھرپور تعاون کریں ۔ صحافیوں کے وفد نے اس سماجی بہبود کے لیے ملک زعیم مہدی بھڈوال کو اپنے بھرپور تعاون کی یقین دہانی کرائی ۔